ارد۲۲۱۳۸۷

استاد هوشنگ جعفری « آغ آتیم » شعری

 

آغ آتیم

آغ آتیم ، قول قاناتیم ،
آت قدمین یورتمه یئری ! [۱]
آش تپه لردن
سیلدیریم تک سره لردن
سئله سینمیش دره لردن
بو نه طوفاندی گؤزل کهلیگیمی ایستیر آییرسین فره لردن [۲]
غیرتیم جوشه گلیر غملی خبردن
آغ آتیم – قورخما خطردن !
آغ آتیم قول ، قاناتیم ،
شیهه چک ، قوی سسیوه
بلکه یاتانلاردا اؤیانسین
یاتماغین واختی دگیل دروسون اوتانسین
یاتانین عؤمرو تالانسین
تازا نعلین وار آتیم
چال بو داغین سینه سینه ، قوی پارالانسین
چال داغین سینه سی باتسین ، یارالانسین
داشی داشدان ، آرالانسین
آغ آتیم قول قاناتیم
داش قایادان آشما چتیندی
قاباق اؤز یوققوشادی ، قاشما چتیندی
داغا دیرماشما چتیندی
داشا ، سووخاشما [۳] چتیندی
باخما یوللاری چتیندی ، اورانین هیبتی یوخدور
آغ آتیم همت ائله !
غیرتی یوخدور
هله اؤز یوققوشالار چوخدو قاباقدا
آشماق اولماز بو آیاقدا
آغ آتیم قول قاناتیم
بسدس ایاق ساخلاما ، گون باتدی قارالدی
گون گئچیب داغ دالینا رنگی سارالدی
داغین اوستون دومان آلدی
آغ آتیم ، بس بو نه حالدی؟
بورا یارقاندی [۴] آتیم دورما آماندی ….
آغ آتیم ، قول قاناتیم
آت قدم آیدینلیغا ساری
هؤرکوشن [۵] اوولاریلان [۶] ؛ چیخ سره یاللاری [۷] یوخاری
قار قالان داغلارا سال بیر نفسین
قوی اریسین بوز کیمی چئگینینده کی قاری
سولاری آرخلارا سال بلکه سووارسین
قوری قالمیش مومالاری
قوی بؤیوک گولده اؤزوشسونله یاشیل باش سونالاری
آغ آتیم
جهد ائله باری
سنی تاری !
آغ آتیم ، قول قاناتیم
طبعیمین دریاسی جوشقوندو
یئل اسدیر لپه لنسین
قوی چالیم صخره لره دالغامی [۸] ، دالغام سپه لنسین
قوی یاغیش تک قورویان
داغلارین اؤستونده اله نسین
هرزه اوتلاری آپارسین
لالا بیتسین
هامی گؤللر تزه لنسین
گؤلو بلبل یییه لنسین
آغ آتیم ، قول قاناتیم
آت قدمین قلعه ی بابکدن آشاق
قارا گؤنلن ساواشاق
آت گؤلوندن سس آتیب ، بابکین حالین سوروشاق
یئنه طوفاندا جوشاق
دریالار تک قوووشاق
آغ آتیم ، قول قاناتیم
شیهه چک قوی سسیوه
هاجرینی ترکینه چکسین نبی گلسین
قوی کور اوغلو آتینی داغلارا سالسین
ائشیدیب شیهه نی گلسین
الده کسگین قیلیجیلا
بویاسین قانه کئچل حمزه نی گلسین
قوی کرم سازینی سالسین دؤشونه ، چؤللره دؤشسون
های سسی ائللره دؤشسون
دئگیلن غملی کرم ایستر اگر ، اصلینی گلسین
دشمنین بلکه کسک نسلینی ، گلسین
قوی بو داغلاردا بؤیوک هلهله دؤشسون
داغلارا ولوله دؤشسون !
آغ آتیم ، قول قاناتیم
منه بیر قالغی بابامدان ، بو ورندیلدی ، بونو چئگنیمه ساللام
قاراداغ باشینی آللام
اورا بیر ولوله ساللام
آغ آتیم دورما ، یوبانسان ، دالی قاللام
آغ آتیم ، قول قاناتیم
بیز اگر قلعه ی سیمرغدان آشساق بیزه آزدی
باخما یوللار ناتارازدی
باخما بو قارلی دماوند ، بو قفقاز بو هرازدی
باخما داغدا هاوا دوتقوندو – آیازدی [۹]
باخما بو قیشدی بو یازدی
آغ آتیم آت قدمین دریا ، دایازدی [۱۰]
دریانی گئچسن اگر شهرِ نیازدی
اوردا هر قان کی تؤکولدو یئره ، آزادلیقی یازدی
بشر آزادلیغا بازدی !
آغ آتیم ، قول قاناتیم
اوردا دؤلبرچین اوتو دؤرت پَر آچیبدی
اوردا دیللنمگه دیل تازه شیرین دیللر آچیبدی
اوردا باغلاردا بوتون گؤل لر آچیبدی
آغ آتیم
آت قدم
آیدینلیغا ساری !

================================

۱-یورتما یئریمک ؛ Yurtma Yerimak؛ آت یئریشی. ۲- فره ؛ Fara ؛ کهلیک بالاسی. ۳-سووخاشما ؛ Sovkhashma ؛ دیرماشماق ۴- یارقان ؛ یارغان ؛ Yarqan ؛ اوچوروم ۵- هؤرکوشن ؛ Hurkushan ؛ اورکوشن ؛ قورخوب قاچان. ۶- اوو؛ Ov ؛ آو ؛ صید ؛ شکار (عوام تصورونده «آو» فارسجا «آهو» نون مخفف تلفظودور و بو نه یانلیش دیر). ۷- دالغا ؛ Dalgha ؛ شپه ؛ موج ؛ لپه. ۸- قوووشوق ؛ Qovushuq ؛ چایلارین قوووشان یئری. ۹- آیاز ؛ Ayaz ؛ آیلیق و سویوق گئجه. ۱۰- دایاز ؛ Dayaz ؛ کم عمق ؛ درین یوخ! (دوزون سؤزو «دایاز» اوچون فارسجادا دوزگون معادل تاپا بیلمه دیم).

  1. الشن۳ آذر ۱۳۸۸
  2. مهدي۵ مهر ۱۳۸۹
  3. mansour ali pour۱۴ مهر ۱۳۸۹
  4. ابراهیم صادقی۲۳ فروردین ۱۳۹۰
  5. ozgur۱۸ دی ۱۳۹۰
  6. تورج حیدرنیا دلخوش۲۲ دی ۱۳۹۱
  7. jafar۲۶ دی ۱۳۹۱
  8. mehdi shojai۲۸ اسفند ۱۳۹۱
  9. احمد۳ فروردین ۱۳۹۲
  10. احمد۳ فروردین ۱۳۹۲
  11. علي۲۰ فروردین ۱۳۹۲
  12. اراز۹ اردیبهشت ۱۳۹۲
  13. مهدی وحمید شجاعی۹ اردیبهشت ۱۳۹۲
  14. اذربایجان اوشاخی۱۸ خرداد ۱۳۹۲
  15. علی۱۱ تیر ۱۳۹۲
  16. sima۱۳ مرداد ۱۳۹۲
  17. ایلقار-مراغا۲۰ آبان ۱۳۹۲
  18. آراز منامن۶ دی ۱۳۹۲
  19. mohsen۱۱ فروردین ۱۳۹۳
  20. انصار قره داغلی۲ اردیبهشت ۱۳۹۳
  21. حسن۲۱ خرداد ۱۳۹۳

پاسخ دهید